Wednesday, January 27, 2010

يا قاعدين يكفيكم شر الجايين .. أو بمعنى أصح السايقين






أكيد بتسألوا نفسكم بعمل إيه هنا وانا يا عيني عليّاَ بنية غلبانة لا ليّاَ في الميكانيكا ولا عندي علم بالأحياء حتى !

الموضوع من الآخر كده انى هاكتب عن حاجات شفتها ومش عجباني اطلاقاً .. أنا مين عشان أكتب عنها مش مهم .. بس الأهم إني بقى ليَّا صوت وهيجلجل ان شاء الله !! .. أنا أكتب إذًا أنا موجود !!

نستفتح ونقول صبَح صبَح يا عم الحاج على رأي عمنا بوحة !!
أول حاجة لازم تعرفوها إن مش قصدى حد بعينه .. بس هموت واقول بأعلى صوتي .. يا جدعان ارحمونا !! تاني حاجة إني أكيد مش ملاك بس عندي يقين إن ممكن بفكرة صغيرة نتغير ونبقى أحسن بكتير ..

مش هطول عليكم بقى .. هبتدي في أول حوار ..
أكيد الناس اللي حبَه تجوَز عيالها بتبقى فرحانة فرح الفيل وأكيد لازم يزفَوهم .. بس اللي مش طبيعي بقى إنهم يوقفوا الشارع بحاله عشان مجرد عايزين يزفَوا العرسان ! .. مقدارين يا جدعان إنكم عايزين تفرحوا وتقولوا للبشر كلها إن الليلة ليلتكم .. بس بالعقل الله يخليكم .. يعني مش فوق الكوبري ومش في وسط البلد مثلا .. ويا ريييت مش في صلاح سالم لإن الشارع ده بيتلكك الصراحة !!!
سواء راجع منه ولا رايح في حتة على طول واقف ! يا إما ازمة كوبري الجلاء يا اما معرض الكتاب يا اما فيه تشريفة .. احم احم .. ماحدش بيعترض عالتشريفة ولا حاجة لا سمح الله .. الواحد بس نفسه يعرف جدول المواعيد عشان ينسى إن فيه أي شارع اسمه صلاح سالم في حياته أصلاً !!

ماعلينا .. مش مهم يقف الشارع .. الأهم إنه مايوقفش عشان حاجة تافهة زي مثلا اتنين قراروا يتكلموا و يرغوا في وسط الطريق من شبابيك عربياتهم ! أُمّال هي الموبايلات اتعملت ليه .. مش عشان خدمة 8000 أو 2121 تشتغل ؟؟!!! طب ماتنفاعوهم باردو بدل مل كل شوية تكلموا ال كول سنتر و تهازأوا اللى جابوهم عشان سرقة الكرديت .. مش صعبانين عليكوا يعنى؟؟!! ..
نتكلم بجد بقى .. ممكن قوي الواحد يركن على جنب ويكلمهم ويسأل عن أي حاجة في الدنيا ! .. وممكن برده الأهل يساعدوا في موقف زي ده .. وفيه حركة جامدة جدا تتعمل برده في الحالات دي .. اننا نسأل احنا رايحين فين قبل مانركب اى تكتك بجنوت فلاحى حتى … ولا إيه ؟!!!

طب سيبك من كل ده .. نفسي أعرف الناس بتقف تتفرج علي حواليها ليه ؟؟!!! .. يعني اتنين وتخنقوا مثلا .. عملوا حادثة .. أي مصيبة يا خوانا .. بقيت الناس تقف تهبب إيه معاهم ؟؟!! .. بتوصيهم مثلا على عيالها ؟؟!! طب بلاش دي .. خد عندك دي كمان ..
قال ايهههههههه .. الواحد مننا يبقى ماشي في أمان الله وفي الحارة اليمين وكل شاء تمام .. تلاقي هوووبباااا مرة واحدة واحد قرر يعدي منك من غير احم ولا دستور .. طب وإيه بقى ؟؟!! .. هتسيبو؟؟!! .. أنا باقولك لأ!!! .. اياك تسيبه يعدي! .. احترم نفسك يا مواطن (وبلاش اقولها حاجة تانية)!!

لازم تعرف إن فيه إشارة ده أولا .. وثانيًا لازم برده تعرف إن عشان تدخل في حارة تانية لازم تسيب اللي جنبك يعدي الأول وبعدين فيه اختراع جامد جدا اسمه مرايات! .. ولو مالقيتش حد يبقى خلاص الدار أمان وعليك إنك تنطلق بقى !!
وقال إيه كمان .. تلاقي حبّت زحمة .. يروح واحد الله يعمر بيته يقرر يمشي عكسي .. فـتلاقي الناس الله يعمر بيتها برده قالت تمشي وراه .. وفجأة تلاقي نفسك طريقك مسدودون مسدودون يا ولدي!
ماهو أصل الواحد لو عنده صبر ويحط في دماغه إن كل واحد عنده مشاوير اللي لازم يلحقها .. كلنا ونعمة هنمشي ..
وأكتر حاجة بقى تقرف الواحد إنه يشوف حد محوت على روحه وكأنه مثلا في حمام بيتهم ! لا عنده خشى ولا عنده ضمير و لا عامل حساب العالم اللي حواليه!!!!!

طب ده يتقاله إيه ؟؟؟!! حمامات وموجودة .. بيوت وموجودة .. محلات أكل وبرده موجودة .. إيه بقى المشكلة إنه زي ما بيركن عشان يقضى حاجته للطبيعة في أي حتة .. يحاول ولو مرة يقدضيها بشياكة واحترام نظافة لييه هو شخصياً واللي حواليه باردو .. فكروا فيها كده شوية .. هتلاقوها أبسط من البساطة والله ..

وعشان ماحدش يقولي إني مُتحملة على الرجالة .. لازم برده ناخد في الاعتبار الستات اللي بتسوق كإن الشارع بيت ابوها مثلا !! وهموت واعرف إيه مشكلة الركنة عندهم وبالضبط المارشدير .. وكله كوم وانعدام ثقافة الإشارات والنور !!!
وبما إننا جبنا سيرة النور .. لازم نذكر طبعا الظينون العالي اللي يعمي العين وينرفز أي بنى أدم قرر فى يوم إنه يستعمل مرايته الأمامية .. وهو مثلا يا جدعان احنا مش شايفين النور التاني؟؟؟!! .. وتفتكروا كده لو كان الظينون هو الأساس .. ماكانت الشركة حاططها وخلصت في الأول .. رجاء مني أنا شخصيا .. ابووووووس خالتك يا شيخ .. دماغي هتفرقع خلاص منه !

نقطة ومن أول الستر عشان لازم ندي تعظيم سلام للناس اللي بتعدي دول أبهاتى و أخواتى و جيرانى و أصحابى و فووق رأسى والله .. بس فجأة تلاقي بنى أدم قدامك ماتعرفش جه امتى ولا الساعة كام وقرر إنه يعدي في الملف اللي إنت داخل فيه مع مليون عربية جنبك .. لا و يتنَح بالقوي ويقولك ايهههههههه في ايههههههههههه ؟؟!!! وحقد الدنيا كله في عيونه .. زي مايكون بيغلس عليك مخصوص عشان مجرد بتعرف تسوق يا عيني .. طب دول حاللهم إيه بقى تفتكروا؟؟!! .. أنا بأقول الرجم!!!! .. طب بجد والله .. ليه بقى فيه لا مبالاه رهيبة عند الناس كده؟ .. محدش جرب يسأل نفسه السؤال ده؟ .. فين درس أداب الطريق ؟ وليه اشارة المرور بقت مش مهمة عند الناس كده ؟؟ .. الميادين على طول زحمة والكباري زحمة والشوارع زحمة والدائري زحمة وأماكن الركنة زحمة .. أنا عارفة إن العدد بقى في الليمون بس ما هو الصين عددهم ضعف عددنا بكتير .. ليه عندهم نظام واحنا لأ ؟؟

معلش يمكن أكون قاسية شوية بس صدقوني .. قوانين أو مش قوانين .. العيب من الاخر فينا احنا .. لا بقى عندنا احترام ولا مباديء ولا أخلاق .. وأكتر حاجة دليل على كده .. السواقة !!
زي مايكون الناس بتتلكك لبعضها عشان مجرد إنها تطلع الكبت اللي عندها .. طب إنت ولا إنتي متضايقة .. ذنب أهل الناس التانية إيه ؟؟؟ .. ده الابتسامة في وجه اخوكم صدقة يا جدعان ..
كل الناس عمالة تقول اتقوا الله في التجارة واتقوا الله في البنات واتقوا الله في المعيشة .. وماحدش فكَّر مرة يقول اتقوا الله في العالم اللي سايقة حواليكم !!
فين محاسبة نفسك ؟ وفين الخوف من ربنا؟ وفين الخوف م ان حد يسمعك وإنت بتشتم؟ وفين الاحترام وعدم الغضب والنصيحة؟ .. فين الاحسان يا جماعة ؟ .. ولا هو من كتر ما الواحد بيفضل يتريق على اسم احسان نسينا إن دي صفة فضيلة أصلا ؟؟ .. وحياة اللي خلقكم يا جماعة .. فكروا مرة بس في اللي عليكم قبل اللي ليكم ..

ودمتم !! كفاية عليكم كده بقى .. أنا عن نفسي تعبت! ..
وبعد اذنكم لو عندكم أي حاجة حبين تحكولي عليها أو تردوا على الاتهامات الفظيعة اللي قلتها عليكم .. ممكن تبعتولي على الاميل بتاعي .. وأكيد هارد عليكم ان شاء الله

Arabeety magazine
January 2010