Thursday, April 15, 2010

...... و أخذ يسقط و يسقط و يسقط .....


جالي الهاجس ده عالصبح امبارح وطبعا أول حاجة عملتها إني كتبتها في الفيسبوك! .. واحدة من صاحباتي كتبتلي "هتتجنني هاهاهاها..." وبنت خالتي قالتلي " طب ويا ترى وقع خلاص؟" .. و واحد هيمان راح قايللي " وراح عامل بوووووم" !
كل إللي عملته إني فضلت أكتب "لأ لسه" .. "لأ لسه" .. زي العيلة الصغيرة إللي متعلقة بقشاية! وبرده ماحدش عرف إيه اللي بيسقط ..

أحب أعلنها وكلي فخر إنه إللي بيسقط يبقى شعري يا ناس .. ويا ريته بيقع عشان يغطي رأس حد تاني .. بس مع الأسف عَمَّال يقع وخلاص .. ولو سألت عن السبب .. إللي يقول لي أصل النفسية في الناملية وإللي يقول لي أصل خلاص عجزتي وإللي يقول لي أصل المياة والهوا خلاص اتسمموا وفي الآخر بيتقال لي روحي لدكتور يديكي علاج .. لأ معليش .. فوتوا عليَّ بكرة!! .. أصل لا مؤاخذة بأخد الدواء من هنا وتلاقي حاجات تانية هي اللي بتطول فـبناقص بقى..


طب هو أنا فعلا عجزت؟؟؟؟ .. ده أنا حتى شكلي عيلة عالآخر ويا بختي بقى زي ما الكل بيقول .. لا وايـــه .. دحّاحة كمان .. أُمّال إيــه ؟؟!!! ..كل ماكنت بمشي في حتة كان بيتقاللي كده .. بس أنا ولا دحّاحة ولا حاجة .. كل الحكاية إني قصيرة وبنظارة .. فالموضوع بيلزق عند الناس إني من صيدلة على طول!

نرجع لموضوعنا إللى مالوش أى هدف الحقيقة غير إنه يعبّر عن الحالة إللى أنا فيها اليومين دول .. ولو أخذنا في الإعتبار الأسباب إللي تم ذكرها .. هنلاقي إن كل إجابة منهم بتصب في حاجة واحدة .. إللي هو أنا ! .. فـبما إنه أنا السبب .. فـأحب أنا برده أعلق بحاجة واحدة .. إنه أنا لا أملك أي تعليق غير إنه لسة .. عَمَّال يسقط ويسقط ويسقط .......

ودمتم

.. N.O.H.A ..