Saturday, January 14, 2012

أنا ونفسي ومش بعدي الطوفان ولا حاجة .. عادي!


بقالي كتير قوي .. كتير قوي ما كتبتش حاجة ليَّا أنا .. حاجة عشاني أنا .. كلام يعبّر عني وعن حالتي أنا ..

ولو مش هيعبّر عني .. على الأقل أقوله ليَّ أنا .. هو ده السبب الرئيسي اللي خلاني أكتب من الأول .. يوم ما عملت المدونة دي من سنة 2007 وأنا كنت بـكتب لنفسي .. كانت محاولة مني إني أعبّر عن نفسي من غير أي قيود ..والأيام عدت وجريت بيَّ وأنا باردو لسة حاسّة نفس الإحساس .. لسة عندي نفس القيود كإن حد بيبُصّ عليَّا ومخابّيلي حاجة تحت الترابيزة هيطعنّي بيها ..

يمكن عشان كده معظم كتابتي عامة جداً .. حتى وأنا بـتكلم عن نفسي .. دايماً بـفكّر نفسي قبل كل بوست .. "لا تذكري أحداث ولا أسامي ولا أوقات ولا تلمحي بأي حاجة لأي حد .. خدي بالك!" .. مع إن أول ما إبتديت المدونة محدش كان بيشوف كلامي تقريباً ..

ياه .. جه على بالي دلوقتي جملة قالهالى واحد زميلي في الجامعة -الله يمسّيه بالخير- لما قلت له أنا عملت المدونة بس مش عارفة إذا كانت هتوصل لحد ولا لأ .. رد عليَّا وقال لي: "محدش عارف .. ممكن قوي توصل .. المهم إنك إبتديتي :)" .. وتقريباَ هي دي عقدة حياتي دايماَ .. إني ابتدي :)))) .. إني أعمل الحاجة اللي بحبها و مش مهم رأى حد!

 طب وهو أنا ليه بـأكتب الكلام ده دلوقتي؟؟ معرفش ..
إيه يعني المفيد في كلامي؟ برده معرفش ..
كل اللي أعرفه إني محتاجة أرجع أكلم  نفسي تاني .. محتاجة أفتكر أنا قد إيه كنت بحب الكتابة .. وليه إبتديت أكتب أصلاً بعيد عن المجلات والناشرين والجو ده .. والأهم من ده كله .. محتاجة أكتب وبس .. لمجرد إني أقول اللي جوايا .. عشان أحس إني عايشة وبـتنفس ..

ساعات كتير قوي الواحد بيحس إنه محتاج يقعد مع نفسه ويراجع حساباته في حاجات كتير .. بس محدش بيعمل حسابه قد إيه العملية دي مؤلمة ومتعبة للشخصية أو الكينونة اللي جوانا .. بس مبيهموش ..
  • عارفة ليه يا نهى؟؟ (أيوه في المرحلة دي لازم اوجه الكلام لنفسي .. متتخدّوش) .. 
  • ليه؟! ..
  • عشان عنده أمل :) .. حتى لو كل حاجة في الدنيا بتقول له غير كده .. فطرته بتحفٍّظه وبتزقّه عشان يتغير ويصلّح من أحواله .. حتى لو كان غصب عنه ..
  • طب وبعدين؟ وأخرتها؟؟؟ .. 
  • معرفش ..
  •  يعني إيه متعرفيش؟! أُمّال مين اللي يعرف؟؟
  • ربك هو علام الغيوب و بكل شيء .. توكلي عليه ..
  • ونعمة بالله .. سبحانه جل جلاله بيده كل شيء وهو على كل شيء قدير .. ولا حول ولا قوة إلا به .. عليه توكلت وهو رب العرش العظيم ..
  • أيوه كده .. أذكري الله .. هو الوحيد اللي عالم بحالك وقادر يريّح قلبك ..

لأ أنا مش مجنونة .. ده اللي بيحصل معايا كل يوم تقريباً .. صراع رهيب ومعظم الناس فاكراه من الفراغ و إنى لو إشتغلت شغلانة تلهينى كل يوم و خرجت و نزلت كتير هـأخف :) .. بس المدهش بقى إن طول عمره معايا وعمره ما فارقني الحمد لله .. أيوه بقول الحمد لله عشان دي مش حاجة وحشة .. دي حاجة إسمها "تهذيب  أو جهاد النفس" .. خناقة يومية بين النفس الأمارة بالسوء والنفس الطيبة ..

إنت بقى .. كل يوم عندك صراع في إيه؟؟ أو مع مين؟؟؟ .. جربت مرة تقف مع نفسك كده وتشوف أول سلمة خطيت عليها كانت ليه؟؟ .. بقولكم إيه .. أنا مليش دعوة .. كل واحد حر .. مش هقول لحد شعارات .. هـوفرها لنفسي و يا ريت تعملوا زيي ..

أنا شعاري المرحلة الجاية "لا جدال" :))))

.. N.O.H.A ..