Sunday, March 10, 2013

لو كان الـــلــــــت إنسان لقتلته!


مساء الفل عليكم .. يا رب تكونوا بخير كده ومستريحين .. عندي كده موضوع نفسي أتكلم فيه من زمان .. زي ما بيقولوا كده محشور في زوري و مش عارفه أفهمه ..

ممكن تكلموني شوية عن النفسنة بليــــــــــــــــز؟؟ .. إيه لازمتها في الحياة .. ها؟؟ .. ليه "أفري ويير يو جوو" في مصر و بره مصر (تحديدا بين المصريين) النفسنة متوغلة بشدة؟! وفي غالب الأحيان تصاحبها التدخل في ما لا يعنينا وكأن الموضوع ده بقى عادي جداً .. لأ ومعدي كمان أكتر من أي مرض .. ليه ها؟! ليه؟!
أظن مفيش حد ما جربش الموضوع ده .. صح؟ 

الحكاية بتبدأ انك لو فتحت بقك بأي حاجة مع حد فجأة بتلاقي البشر كلها عارفة كل حاجة عنك .. لبست ايه الصبح .. زعقت في مين النهاردة .. خرجت مع مين امبارح .. الايشارب الفلاني جبته منين وهلم جرى.. اللت اشتغل عالفاضي والمليان ..
ولو لقوكي ساكتة (بعد الشر) ومش رغاية بيبدأوا يستفزوكي عشان يعرفوا أي حاجة عنك .. يلا ما هو الكلام ببلاش ومفيش مانع يزودوا حبة شطة وتحابيش عالماشي من بتاعة "هي مالها تنكة كده ليه؟" عشان يضمنوا ان مفيش أحسن منهم في المن(تش)قة :] ..أاه أمال ايه؟؟!!

وفي الغالب الحكاية دي ما بتنتهيش لإن للأسف التحول لطبع .. والنفس الأمارة بـالسوء بتتغذى أحلى غذاء وبتعجبها الليلة بقى .. ممكن يستلموكي النهارده أو الواد الحليوة فلان الفلاني بكرة .. بعده مديرتيك على حبة تحابيش من "دي ساحرة شريرة! إزاي إنتي مبسوطة معاها؟" .. على أساس إنهم يحسسوكي إنك غريبة يا عيني في وسطيهم .. بس متقلقيش .. أنا بقولك خليكي غريبة .. على الأقل عشان متوقعيش نفسك في غلط ملوش أي تلاتين لازمة وتلبسيه إنتي في الآخر ..
بس بصراحة  أنا متغاظة قوي .. نفسى أفهم!

أمنية حياتي إني أخُش جوه دماغ اللتات أفهم إيه الحب الرهيب المتواصل اللي عنده تجاه "الـلـــــــت" .. يعني بيفكر إزاي؟! بينام عادي زينا كده؟ مفيش كوابيس من أي نوع؟! وإيه المتعة الغريبة في تأليف الأخبار؟؟ .. طب متخيل أو متخيلة الدنيا عبارة عن إيه؟ "وان بيج هابي لتاتين" ؟؟؟؟  .. طب الدماغ مبتصدعش من الكلام على الناس؟ ويا ريت بتقف عند كده وبس .. لاااااا ده لازم يخلوا كل اللي حواليهم زيهم بالضبط .. ولو حسوا للحظة إنه بيتعامل " بهدووووووووء" كل الافتراءات اللي في الدنيا تظهر ..

طب والحل يا جدعان؟ أيوه يعني هتفضلوا كده لحد امتى؟! وعشان إيه؟ .. أنا مش مصدقة بصراحة انكم مرتاحين .. يعني أكيد أكيد نفسكم تتغيروا بس مش عارفين ..

أنا عندي حل طيب, تسمعوه؟! .. بسيط آه بس يقضي الغرض .. لو لقيته حد منكد عليكم عيشتكم صبح وليل وهاري نفسه كلام (من غير إحساس الاضطهاد ده أنا عارفاه كويس  .. مش حلو عشان صحتكم .. انسوه .. ساعتها الحاجة الوحيدة اللي تعملوها هي التطنيش التام أو الموت الزوقام … آه والله مبينفعش غير كده .. وفي رواية أخرى "في الأحلام طبعا" ممكن تفرجوا الناس عليهم  وتطلعوا الغل اللي جواكم .. بس اوعوا تكونوا بتتكلموا وانتم نايمين! 

أصل الفكرة في إيه؟ لو احتكيتم أو شديتم معاهم في الكلام مش بعيد تتنرفزوا وتطلع منكم كلمة كده ولا كده وساعتها هتندموا أشد الندم .. وده بالضبط اللي هما عايزينه .. لو الواحد نسي  للحظة بس إنه  بيتكلم مع لتات وفتحله قلبه والله لو عملتوا إيه ما هتعرفوا توقّفوه .. ده هدف حياته أصلا زي الأكل والشرب ودخول الحمام بالضبط … ولو مقهورين ونفسكم "تبعبروا" باللي في نفسكم اعملوا زيي .. جربوا تكتبوا.. على جنب كده خلوا عندكم كراسة صغيرة ادلقوا فيها كل اللي غيظكم في الدنيا .. وممكن برضه تلعبوا رياضة أو تسبّحوا .. وده مش كلام محاضرات والله ومفعولهم سحري في الحالات اللي زي دي .. وده حل متجرب منى شخصياً .. على ضمنتى يعنى :)

ومعلومة صغيرة للستات عشان ميحسوش إنهم لوحدهم .. الرجالة كمان ليهم في اللت والغيرة .. ماتصدقيش أي راجل ييجي يقولك مفيش كده بينهم .. لأ فيه :) هما بيعرفوا يداروا كويس ;) وفيه كمان الأكتر من الغيرة .. فيه الانتقام وده أعوذ بالله منه بقى .. بلاش نخش في دايرته أحسن ..

الخلاصة .. خفوا شوية على نفسكم .. متركزوش مين بيقول عليكم إيه عشان الناس مش هتبطل كلام فأحسن حاجة تخلوا بينكم وبين أي لتات مسافات أو جزء طفيف من الحدود ..

نصيحة: ماتحكوش لحد أي حاجة غير وإنتي واثقة إنه بيحبلك الخير بجد .. ولو مش لاقيين حد دلوقتي ماتقلقوش .. كل شيء بأوان حتى الأصحاب :) .. بس خلّوا نيتكم صافية لله واصرفوا السوء من حياتك عشان يجيلك الخير ..
كبروا دماغكم وماتشيلوش حاجة في قلبكم .. الغل وحش قوي بيبان في الوش وبيخلي القلب حجر .. أنا عارفة إنها حاجة صعبة .. أنا مش ملاك على فكرة..  ياما شفت كتير زيكم بس حاولوا وجاهدوا نفسكم .. والله لو حاولتم وطلبتوها من ربنا هينولها لكم .. ربنا بيعين الواحد جامد جداً في الحالات دي بس المهم تكونوا فعلا عاوزين كده من جواكم .. خللوا عندكم يقين بالإجابة وده الأهم :)