Thursday, March 20, 2014

مش دايما قلبك بيكون صح ..


مش دايما قلبك بيكون صح ..

مش دايما بـيقف جنبك ويخليك تقف على حيلك من تاني ..
ممكن قوي تلاقيه معطل لك حياتك ومش عايزك تفوق ..

ممكن قوي يكون بيكدب عليك .. أيوه بيكدب عليك ..
بيتهيألك إنه الوحيد اللي بيحبك وعايز مصلحتك .. بيخليك تدور على إنسان كل همه نفسه وبس ويقنعك إنه ميعرفش يحب  غيرك ..
بتعيش في وهم إنه ضحى عشانك وشايف مصلحتك ..والحقيقة غير كده .. الحقيقة إنه مش هيقدر يعمل غير كده .. الوهم هو السلاح الوحيد قدام نفسه وقدامك ..

هتفضل تدافع عن قلبك كتير .. مش هيستسلم بسهولة .. لمجرد إنك مش هتقدر تتخيل إنه هو من دون الناس  .. هو نفس الشخص اللي كان بيتمنى ينام على صوتك .. هو اللي في الآخر مقدرش يستحمل .. إختار نفسه في الآخر ..
أيوه اختار نفسه .. إيه اللي غريب فيها دي؟!
أيوه واخد قرار ومرتب حالُه وبيفكر في نفسه وبس … وقلبك هيقف جنبه ويسانده .. عشان نجح إنه يخلي قلبك في إيده ..عرف إزاي يكسبه .. انتصر على مليون واحد جه قبله وعرفه .. عرف يخليه يحبه ..

عشان كده ماينفعش تستسلم لقلبك .. قلبك معدش ملكك .. قلبك مش صح ..
عشان كده ماينفعش تستسلم لمشاعر الحنين اللي جواك ..عشان كده ماينفعش تهين نفسك وكرامتك أكتر من كده .. تفضل سنين على أمل زائف إنه بيفكر فيك وعايزك .. إنه هيلف يلف ويرجعلك ..

لو كان عايزك بجد كان ماخترش نفسه .. لو بيحبك بجد مكنش داس عليك واتحمل بعدك عنه .. مكانش رفض وجودك جنبه وهو عارف قد إيه قلبك متمناش غيره ولا حلم إلا بسعادته .. مكانش فكَّر في حد تاني وعاش حياة تانية .. مكانش رضي إنك تعيش مع غيره ..مكانش اختار يضيعك من إيده عشان يعيش ..مكانش بقى أناني ..

لازم تنساه وتنسى قلبك ..ماعدش ملكك .. أيوه ماعدش ملكك .. مش هيرجعلك .. لا هو ولا قلبك ..
كرامته هي سعادته .. حب نفسه أغلى منك ومن قلبك ..

ارحم نفسك قبل قلبك ..
ماتستناش قلبك يرجعلك غير لما يتعلم ..
أيوه لازم تسيب قلبك يتعلم .. لازم يتألم عشان مايستسلمش لحد تاني .. لازم يتجرح والجرح يعلم .. لازم يفوق من الوهم .. لازم يعرف حقيقة الي خانه .. لازم يدوق المر عشان يفضل معاك .. عشان لما حد تاني ييجي يقول له "إنت ملكي" .. يقف قصاده ومايسيبكش .. يختارك إنت مش هو .. يستسلم إنه يكون بإيدك إنت وبس ..

وبس ...