Saturday, April 19, 2014

#الناس_اللي_معاها_فلوس


مشكلتي دايماً مع فئة من #الناس_اللي_معاها_فلوس ومعتبرين نفسهم من صفوة المجتمع إن نسبة كبيرة منهم ما بيبقاش عندهم إحساس باللي أقل منهم في حجات تانية كتير مش في الفلوس وبس .. بتحس معاهم بعدم الراحة ونوع غريب من التحقير للذات .. بمعنى أصح بيبقى نفسك الدنيا تتشق وتبلعك ولا إنك تقف معاهم ٥ دقايق على بعض ويحسسوك بالنقص أو العجز ..

بالإنجليزي بيقولوا عليهم بيفتقدوا ال "Empathy" مش ال "Sympathy" ..

"Sympathy" = شفقة على الغير ..
لكن "Empathy" معناها التعاطف مع الغير .. 
والفرق كبييييييير قوي بينهم ..

التعاطف فيه عزِة مش ذِلة للبني آدم اللي قدامك .. بمعنى أصح بتتخيل نفسك مكانه بقلبك قبل عقلك وتبتدي تتفكر وتسأل إنت نفسك هتعمل إيه في نفس موقفه وبتساعده فعلاً كأنك في مكانه بالظبط .. ولو مانجحتش في مساعدته، في الغالب عشان بيطلع هو أشجع منك بكتير .. ولو كنت فعلياً في مكانه ولو للحظة مابتقدرش تستحمل اللي شافه هو لسنين طويلة أو هيفضل معاه لبقية حياته ..

لكن الشفقة إحساس مريض بالغرور والتعالي وعدم المراعاة وبينجح بسهولة شديدة إنه يكسر البني آدم ويفتته حتت .. مش بس كده .. ممكن قوي نظرة عينيك تمنعه من ممارسة حياته طبيعي لسنين وسنين قدام لمجرد تفادي نظرتك دي من أشخاص تانية .. لأن ببساطة بتخليه يعيد كل شريط حياته قصاد عينيه في لحظة وبسرعة البرق .. فبيكره نفسه و وضعه .. وكفاية الحسرة اللي بتكون في قلبه بعديها ..

حاول تعمل واقفة مع نفسك كده من حين لأخر وتحدد ..
لو إنت من #ولاد_الناس_الكويسين .. لما بتشوف حد بيتألم قدامك بتعمل أنهي فيهم؟! 
هل فعلاً بتقدر توصّل إحساسك صح ولا بتعمل زي أي حد ماشي في الشارع وتبدأ تسأل أسئلة سخيفة زي "إنت إزاي سايب نفسك كده؟! لازم ولازم ولازم ..... " لمجرد إنك تتباهى قدام الناس اللي حواليك عشان يقولوا عليك بتاع أعمال خيرية أو قلبك حنين أو إنك قدامهم عايش للناس مش ليك؟؟؟

والأهم من كل ده .. هل محتاجين مساعدتك فعلاً؟!
حاسس بيه/بيها بجد؟؟
واللي جواك ده إيه؟؟
هدفك الحقيقي إيه؟؟
نيتك رايحة فين؟!
بتعمل الخير ليه ولمين؟؟
لربنا سبحانه وتعالى ولا لنفسك؟!

#سؤال
#جدد_نيتك
#الرحمة_حلوة
#بالقلب_مش_بالعقل_وبس
#كله_بالحب
#الدنيا_دوارة

Saturday, April 12, 2014

الصلاة حب

من المغالطات الكتيرة اللي اتعلمناها في المدارس زمان إن صلاة #الفجر هي صلاة الصبح ..

مكانش فيه في القاموس المنهجي حاجة إسمها صلاة في جوف الليل من الأصل .. ثم ليه أصلاً الواحد يصحى مخصوص عشان يصلي ركعتين ويرجع ينام تاني؟! إنت مجنون؟!
يا راجل #كبر_مخك !
#الدين_يُسر_مش_عُسر

والمشكلة مكانتش في ضياع الفرض منك وبس لسنين طويلة ما تعرفش هتعوضهم امتى .. لا لا ابسولوتلي!

المشكلة الأكبر إن #صلاة_الفجر أحلى صلاة في اليوم كله .. فيها مناجاة وخبايا بينك وبين رب العِزة محدش في الدنيا يعرفها! فيها خيرات وحلاوة وسكينة وإحتواء فعلي وتوفيق في الدنيا والآخرة من رب العالمين .. فيها الحُضن اللي بتدور عليه كل يوم ومش لاقيه .. مش مجرد أداء مناسك وبس .. خصوصاً لما تستشعر إنه بينظر ليك بالفعل .. #إنت_وبس

هما علمونا إن #الصلاة_عماد_الدين ولازم تصلي عشان تخش #الجنة مش #النار أه ..
وعلمونا إن السُنن مش مهمة :)
بس ما علموناش إن لما الواحد بيحب حد بيكون عنده شوق ليه على طول ونِفّسه يكلمه ٢٤ ساعة في ال ٢٤ ساعة .. وإن الصلاة هي الوسيلة الأساسية للتواصل مع اللي بتحبه .. #الله_جل_جلاله

ما خلوش عندك هدف أو حتى وعّوك إن #حلاوة_الإيمان هي السعادة الحقيقية في الدنيا دي ..
ما علوموناش إن رب العالمين لا تأخذه سِنةٌ ولا نوم وإنه بيسمعك أي وقت حتى وإنت عاصي ومليان ذنوب وبيحب يسمع صوتك إنت "العاصي" أكتر من أي حد تاني ..
ما نبهوناش إن #الدعاء يغيّر الأقدار وإنه #الودود .. "ودود" يا ناس ودود! يعني زي ما حد بيحبك ييجي ينكُشك كده ويهزر معاك عشان يشوف ضحكتك .. #ولله_المثل_الأعلى

مين فينا وحشه ربنا بجد ونفسه يرد عليه؟!
مين فينا بيحس إنه مهما حكى حاله لبني أدمين مافيش غير ربنا اللي بيسمع بجد؟!
مين فينا ماعدش حاسس بطعم الحياة ومهما سافر وأكل وجرب حاجات جديدة لسه قلبه وجعه ومقبوض على طول؟!
مين فينا مافقدش أب أو أم أو صديق أو أخ أو إبن حتى وهما أحياء لسه؟!

فكر فيها كده .. ليك مين غيره بعد كل ده؟! مين؟!
ولما تتوفى .. هتروح فين؟!
هتكون مع حد بيحبك وبتحبه وبيطبطب عليك؟! .. ولا عايز نفس دنيتك اللي كنت فيها من غير زيادة أو نُقصان؟!

هتختار إيه؟! :)

#الصلاة_حب
#الصلاة_مش_مناسك_وبس
#يقيني_بالله_يقين
#الجنة_هي_المأوى
#الله_حبيبي

Tuesday, April 1, 2014

#الطبطبة

رسوم أمل علي 


هو هييجي يوم علينا نحكم على أخلاق واحدة من منظور السيدة آسيا زوجة فرعون مش من منظور زوجة نبي الله نوح؟!

تفتكروا فعلاً الراجل هيعامل الست على إنها عفيفة مش معقدة أو ضعيفة؟!

تفتكروا الأب هيعمل حساب لقلب بنته قبل ما يجوزها لأول واحد يدفع أكتر؟!

تفتكروا البنت هتقدر تبوح بقبولها ناحية شخص ما ورغبتها في الإرتباط بيه زي ما أم المؤمنين السيدة خديجة عملت مع سيدنا مُحمد عليه أفضل الصلاة والسلام؟!

إمتى هنعلم ولادنا قبل بناتنا إن حلاوة البنت في أخلاقها وكرامتها وعزتها وعفتها وجدعنتها مش في مظهرها ولا كلامها ولا خدمتها ولا طبخها وغسيلها؟!

والله البنت حنينة قوي وسهل تكسبها .. بتحب تعمل كل حاجة بشغف .. عايزة تحس إن ليها هدف في الحياة ..

كلمة منك بالدنيا عندها .. ربنا خلقها "سكن" ليك ..
بتحب الأمل وبتحب الحياة في طاعة ربنا ..

عارف الطبطبة؟! .. أيوة الطبطبة ولا نسيت؟! :)
اللي بتجري على أمك في الخباسة وتسرقها دي ..
هي وحدها "الطبطبة" اللي بتحل كل حاجة مهما عملت من كوارث ..

جربها ومش هتندم :)

#جبر_الخواطر
#رفقاً_بالقوارير
#رحمة_الله_وسعت_كل_شئ


#خاطرة

رسوم أمل علي 

في كل رُكن،
في كل كلمة،
في كل حلم،
في كل خطوة،
في كل فكرة،
في كل نظرة،
في كل دقة قلب،
في كل ضحكة،

 ذكرى ...

.. N.O.H.A ..

Your Own Defenition


Jobs doesn't define a person,
Wealth doesn't define a person,
Poverty doesn't define a person,
Where you're brought up doesn't define you as a person,
What you say doesn't define you as a person,

It's what you've been through that does ... What's deep down in your heart, after all these years, is what really counts ...

How healthy is your heart? Can you tell?!


.. N.O.H.A ..