Thursday, June 19, 2014

#الإستغفار


أَمْ يَحْسَبُونَ أَنَّا لَا نَسْمَعُ سِرَّهُمْ وَنَجْوَاهُم بَلَى وَرُسُلُنَا لَدَيْهِمْ يَكْتُبُونَ (٨٠)

•• إوعى تآمن للشيطان ..

•• إوعى تآمن لنفسك الأمارة بالسوء ..

•• إوعى ينسّوك إن #رب_العالمين سامع سِرّك ونجواك طول الوقت .. كل اللي بتفكر فيه بيتكتب .. كل نفس بتتنفسه .. كل خطوة .. كل قرار .. كل معاملة .. كل كلمة .. كل حرف .. معاك وإنت بتعصيه أو بتعبده ..

•• وفوق كل ده .. إوعى تستهين بقدرة #الله عز وجل .. إوعى تسوّف #التوبة أكتر من كده .. خد بالك من سحر #الوسطية .. مش في كل حاجة تعتمد على ربنا #الغفور #الرحيم .. لازم تفكّر نفسك دايماً إنه #القوي #المتين #المُحي #المميت ..

•• داوم على #الإستغفار .. أمورنا كلها بيد الله وحده لا شريك له .. ولا حول ولا قوة إلا به ..
#كن_مع_الله .. #كن_مع_التواب_الرحيم


#سورة_الزخرف
#لن_نهجر #قرآن #الفجر
#تدبر_القرآن
#عايش_معاه

#الإنكسار_لله



فَالْتَقَمَهُ الْحُوتُ وَهُوَ مُلِيمٌ (١٤٢) فَلَوْلا أَنَّهُ كَانَ مِنَ الْمُسَبِّحِينَ (١٤٣) لَلَبِثَ فِي بَطْنِهِ إِلَى يَوْمِ يُبْعَثُونَ (١٤٤)

•• #يا_الله !!
سيدنا #يونس كان هيفضل في بطن الحوت ليوم الدين .. متخيل؟! .. #يوم_الدين !!
كل ده عشان ضِعف للحظة وزِهق وأعرض عن الدور اللي #رب_العالمين أسنده إليه لدعوة الناس ..

•• كل ده عشان نسي إن الله سبحانه وتعالى هو #القادر على كل شئ وما عليه غير تطبيق ما يأمره .. يثق فيه ويشتغل ويدعو والأمر كله على الله ..

•• أكيد كان بيقول في نفسه: "مش هينفع" .. "مش هيحصل" .. "ربنا مش راضي عني" .. "كده كده هدخل النار .. مش فارقة" ..

•• يا ترى إنت كمان بتعمل كده ولا لسه في قلبك #كِبر إنك أحسن من فلان وفلان وإشمعنى هو/هي؟! .. 
طب وإنت زعلان بتلوم الظروف والناس بس ولا بتعترف بأخطائك ونفسك تتغير؟! ..

•• طب على سبيل التشجيع .. إيه رأيك تلحق #التوبة النهاردة قبل بكرة؟! .. جرب #الإنكسار_لله والإعتراف بقدرته وشوف هيحصل معاك إيه .. بس خليك واعي إنه #الأحد #الصمد مالك السموات والأرض وإنك مجرد قطرة تسبح في مُلكه ولا حول ولا قوة لك إلا به .. يعني أصبر على حكمه وماتستعجلش و واللهِ هيراضيك ويكفيك ويعزّك .. #ما_عند_الله_خيرٌ_وأبقى 

•• قول ورايا وماتنساش :
لا إِلَهَ إِلا أَنْتَ سُبْحَانَكَ إِنِّي كُنْتُ مِنَ الظَّالِمِينَ 
لا إِلَهَ إِلا أَنْتَ سُبْحَانَكَ إِنِّي كُنْتُ مِنَ الظَّالِمِينَ 
لا إِلَهَ إِلا أَنْتَ سُبْحَانَكَ إِنِّي كُنْتُ مِنَ الظَّالِمِينَ 

#سورة_الصافات
#لن_نهجر #قرآن #الفجر
#تدبر_القرآن
#عايش_معاه

Sunday, June 15, 2014

ما عِند الله خيرٌ وأبقى

أصوات سارينة ونباح كلاب وشتايم من أفواه عيال ضآلة وزعيق بني أدمين وكلاكسات عربيات متزاحمة وحر وعرق وتعطيل مصالح وإصدار أحكام بالإعدام وشباب بينزل من بيته عشان يموت وشوية عواجيز حرامية متحكمة في بلد متمرمغة في الحرام والفساد .... إلخ إلخ إلخ 

كل "ده" وفي ال background فيه صوت صغير جاي من بعيد .. صوت عصافير بتحاول تنادي
على بعض .. الشئ الوحيد اللي متخيلاها بتقوله :

"ما عِند الله خيرٌ وأبقى .."
"ما عِند الله خيرٌ وأبقى .."
"ما عِند الله خيرٌ وأبقى .."

#يا_رب الصبر من عندك .. لا حول ولا قوة إلا بك <3


#الجنة #يا_رب

•• مشتاق ل #الجنة بس حاسس إنك ماتستهلش؟! جرب الخطوات دي:

وَسَارِعُوا إِلَى مَغْفِرَةٍ مِنْ رَبِّكُمْ وَجَنَّةٍ عَرْضُهَا السَّمَاوَاتُ وَالأَرْضُ أُعِدَّتْ لِلْمُتَّقِينَ (١٣٣) 
الَّذِينَ يُنفِقُونَ فِي السَّرَّاءِ وَالضَّرَّاءِ وَالْكَاظِمِينَ الْغَيْظَ وَالْعَافِينَ عَنِ النَّاسِ وَاللَّهُ يُحِبُّ الْمُحْسِنِينَ (١٣٤) 
وَالَّذِينَ إِذَا فَعَلُوا فَاحِشَةً أَوْ ظَلَمُوا أَنْفُسَهُمْ ذَكَرُوا اللَّهَ فَاسْتَغْفَرُوا لِذُنُوبِهِمْ وَمَنْ يَغْفِرُ الذُّنُوبَ إِلا اللَّهُ وَلَمْ يُصِرُّوا عَلَى مَا فَعَلُوا وَهُمْ يَعْلَمُونَ (١٣٥) 

أُولَئِكَ جَزَاؤُهُم مَّغْفِرَةٌ مِّن رَّبِّهِمْ وَجَنَّاتٌ تَجْرِي مِن تَحْتِهَا الْأَنْهَارُ خَالِدِينَ فِيهَا وَنِعْمَ أَجْرُ الْعَامِلِينَ (١٣٦) 

•• يعني طلب المغفرة + إنفاق صدقات + كظم الغيظ + العفو + الإحسان + الإعتراف بالمعصية + ذكر الله + الإستغفار + ترك المعصية وعدم الإصرار عليها = مغفرة من الله + جنات تجري من تحتها الأنهار (مش جنة واحدة!) ••

#سورة_آل_عمران
#لن_نهجر #تدبر_القرآن #الفجر 
#عايش_معاه


تباً للسطحية!


هو ليه بقى صعب قوي اليومين دول تلاقي شخص بسيط و ماعندوش إهتمام بالمظاهر؟!

يعني هي #السطحية بتفيد فى إيه؟! نفسي أفهم ...
حقيقي مش قادرة أستوعب لازمتها إيه فى الحياة ...

كل اللي بشوفه قدامي كوكتيل من النفاق والكذب والخداع والنصب بيتشكل فى إنسان بلا روح و بلا كينونة ..
غصب عني بتختق ومابعرفش أصمد لثواني قدامهم ..
#بالبلدي_كده ريحيتهم بتبقى فايحة وبيبان عليا :)

زي بالظبط اللي رايحة تخطب لإبنها وكل اللي هاممها إزاي العروسة تاكل لبانة قدام العريس ومش لابسة ألوان فاتحة .. ولا التاني اللي لازم يشتري مرسيدس عشان بس صحابه راكبين Bmw .. أو مثلاً الأب اللي مش مستوعب إن المهر أصلاً من حق البنت ومالوش إنه يصرف منه مليم في جهازها عشان المظاهر ! .. بالذمة مش كل  ده نصب في نصب؟!

هو ليه الواحد مبقاش يلاقي ناس قلبها صافي وقعدتها حلوة و تحس بحنيّتها من بعيد؟؟!!
يا ترى لسه فيه ناس بتبتسم في وشك عشان فعلاً فرحانة من قلبها إنها شافتك؟! :)

#الحب راح فين يا جدعان؟؟!!
#القلوب ليه إتحجّرت كده؟!
#الحضن_الرباني الخالي من أي مصالح ده راح فين؟؟

#خسارة_واللهِ
#تباً

هو #الكريم

عارف يعني إيه إن الله سبحانه وتعالى #كريم  ؟!
كريم يعني بيحب يكرمك حتى وإنت بعيد ..
#ودود .. بيحب يسمع صوتك ..

أُطلب منه حاجة سر بينك وبينه كده ومش هيخذلك .. والله ما هيخذلك .. بس الجأ له ..
بس أطلب منه المدد هو "وحده" وهتشوف ..
ما تضعفش وتقول "لا يمكن تحصل" .. والله أبداً .. عدم يقينك هو اللي هيضيعها ..

وخد بالك .. رب العالمين بيغير :)
أيوة بيغير تطلب حاجة من حد تاني غيره ..
بيغير قلبك يكون متعلق بحد تاني ومستني منه العون ..
كلمة السر #الإخلاص .. #الإعتماد عليه هو وحده لا شريك له ..
هو ده اللي بيجيب من الأخر زي ما بيقولوا :)

عارف لما تعملها؟! .. والله هتشوف آيات ..
هتبقى خجلان من نفسك وإنت لسه ضعيف ومش قادر تشكره .. ومهما عملت من طاعات باردو هتحس إنها نقطة في بحر من كرمه عليك ..

بس #مش_عيب أبداً تكون ضعيف .. العيب اللي بجد إنك تتكبّر على اللي خلقك وما تلجألوش .. تيأس وتفتكر إن أعمالك مش بتوصل .. لأ والله بتوصل بس #ماتستعجلش

#ماتكابرش .. مهما روحت وجيت وسافرت وإتشقلبت .. باردو هتركع له وحده .. مش عشان هو العزيز القوي بس .. لأ ..
عشان مش هتلاقي أحن منه عليك .. 
عشان هو بس اللي عارف اللي بيجري في دمك ومتقبلك زي ما إنت .. 
هو الغني وإحنا الفقراء إليه ..
هو الأقرب إليك من حبل الوريد ..

وعشان الرحمة اللي عنده ليك ملهاش وصف ولا مثيل .. أرجوك إفتكر إنه بيحبك .. نفسه يبقى جنبك .. نفسك بس تفتكره وتتمنى لقاه ..
بالذمة هتلاقي حد يحبك كده؟! :)
أتحداك! .. #مفيش

هو #الحب_كله <3
هو #الله